Predstavom „Za umrijet od smijeha“ pozorišta Planet Art i Rugantino teatar iz Zagreba nastavlja se program Hercegnovskih aprilskih pozorišnih svečanosti.
„Za umrijet od smijeha je satirična bajka ili anti-bajka”, kaže Marko Torjanac koji je adaptirao dramski tekst nastao prema komadu „Laughing Wild“ Kristofera Duranga iz 1987. godine. Predstavu je režirao Mario Kovač, dok glumački tandem čine Gordana Gadžić i Marko Torjanac.
Predstava publici, na satiričan način, uz mnogo humora postavlja krajnje ozbiljna pitanja o našoj stvarnosti iz zamišljene budućnosti.
“Bajke su slične našim snovima, onome što intimno sanjamo i priželjkujemo. Bajkama smo oduvijek opisivali zamišljen svijet koji nas, nakon svih prepreka, ipak odvodi u neku bolju stvarnost”, objašnjava Torjanac.
Predstava će večeras u Dvorani Park početi u 20:30 časova, a cijena ulaznice je 5 eura. Ulaznice se mogu kupiti na blagajni Dvorane Park od 9 do 12 časova i od 18 do 20 i 30 časova.
