Tačno četrdeset dana nakon što je bačena u more, boca sa ilustracijama strip junaka nacrtanim na ovogodišnjem, petnaestom Hercegnovskom strip festivalu doplovila je do Italije, tačnije do plaže Le Ćezine, u blizini grada Leće u pokrajini Apuliji. Bocu je juče pronašla djevojka po imeni Kjara, koja je odmah kontaktirala autora, Sedata Ozgena, specijalnog gosta HSF-a iz Njemačke.
„Bila je to uzbudljiva avantura, vidjeti bocu, otvoriti je i pronaći poruku“, napisala mu je Kjara.
Njemački autor je odmah kontaktirao HSF i prenio nam sjajnu vijest, a svojim pratiocima na društvenim mrežama je napisao
„Ovo je fantastično. Tokom gostovanja na Hercegnovskom strip festivalu u Crnoj Gori stavili smo crteže u boce i bacili ih u more. Upravo je neko u Italiji pronašao bocu sa mojim ilustracijama. Ludo, zar ne?“
Sedat Ozgen, jedan od upečatljivijih ovogodišnjih specijalnih gostiju, čovjek je koji je sa neskrivenim entuzijazmom govorio o svom iskustvu na HSF-u:
„Hercegnovski strip festival je vjerovatno najbolji festival stripa koji se može zamisliti“, napisao je, između ostalog, Ozgen u osvrtu na proteklo izdanje jedine naše manifestacije posvećene devetoj umjetnosti. Magija HSF-a donijela je ovom gostu još jednu lijepu uspomenu, za koju smo sigurni da je nije mogao ni zamisliti.
Podsjetimo, ovo je peta HSF boca sa stripom koja je pronađena. Prethodne četiri pronađene su u Brindiziju u Italiji, uvali Mala Draga na Istri, na otoku Pašmanu u Hrvatskoj i u Bigovi u Crnoj Gori. Pored Ozgena, autori čiji su radovi pronađeni su Iztok Sitar, Valentina Briški, Midhat Kapetanović i Filip Andronik.
