Hercegnovska umjetnica Đurđa Milatović uskoro će imati izložbu art nakita u galeriji Sue Ryder.
‘Početna inspiracija mi je bila koreanska tehnika “keum boo”, na koju sam slučajno nabasala na netu. To je drevna tehnika obrađivanja zlata i srebra, ta dva metala na velikoj temperaturi, poslije čega se taj predmet uranja u kiselinu od koje srebro pocrni i nastaje taj kontrast crne i zlatne. Naravno, polimerna glina u kojoj ja radim nema veze sa plemenitim metalima, ali taj odnos boja i površina meje inspirisao da pokušam nešto slično da izvedem. A onda je sam materijal i druge mogućnosti koje on pruža preuzeo stvar, pa sam prešla na druge boje i kombinacije’ – kaže Đurđa.
Ona je sa izradom nakita počela prije svega godinu dana u okviru projekta “Dorra Nuova”
‘Tamo smo učili razne tehnike, ali izrada nakita od FIMO-a mi se baš svidela. To je polimerna glina, a FIMO je zapravo brend. Poslije nekog vremena isprobavanja i ekspeeimentisanja sa ovim materijalom skontala sam da bih mogla da napravim kolekciju koja bi više odgovarala izlaganju u nekom galerijskom prostoru. Više nekako “art”, manje komercijalno’ – objašnjava Đurđa.
Đurđa je diplomirala slikarstvo na Likovnoj Akademiji na Cetinju. Prvi put samostalno je izlagala u foajeu Dvorane Park u Herceg Novom 2012.godine, a zatim u galeriji-lounge baru Amerika 2017. godine.
Detalji o nakitu mogu se vidjeti na na Facebook strani FIMO line Montenegro
