„Nemam ja šta da slavim rođendan, rođendani se slave kada si mlad, a ne kad imaš sto godina“, u svom stilu je za Herceg Novi Cool rekao veliki slikar Vojo Stanić koji je danas napunio 95 godina. Zatekli smo ga u kafeu Stanica na Škveru, gdje svaki dan ode na kafu, a gdje su mu domaćini i priredili iznenađenje i napravili mu rođendansku tortu.
„Stid me koliko puno godina imam, mada ih nisam nikada krio“, kazao je Vojo za naš portal i ugasio svjećice na svojoj rođendanskoj torti.
Na pitanje kako obilježava svoj rođendan legendarni umjetnik sa Škvera kaže da je za njega to dan kao i svaki drugi.
„Jedan od milion dana“, kaže svjetski poznati slikar iza kojeg je skoro 80 samostalnih i više od 150 kolektivnih izložbi. On vrlo rijetko daje intervjue i vrlo rijetko priča za medije, tim više je ovaj momenat za naš portal jako značajan i privilegija koju smo imali zahvaljujući ljubaznosti osoblju kafea Stanica na Škveru, a to smo iskoristi samo toliko da pitamo velikog umjetnika da uporedi svoj grad nekad i sad:
„Herceg Novi ima sad više umjetnika nego ikad i ima i dalje epitet grad umjetnika, međutim Novi je, po mom računu, u nekom civilizacijskom smislu i kulturnosti građanstva, bio daleko kulturniji grad prije 50 godina nego sad“, kroz smijeh je kazao Stanić za naš portal i posvetio se svojoj svakodnevnoj rutini – kratkom espressu, čaši crvenog vina i luli.
